نئی دہلی، 25/ستمبر (ایس او نیوز /ایجنسی) جموں و کشمیر میں بدھ کے روز اسمبلی انتخابات کے دوسرے مرحلے کے تحت 26 نشستوں پر ووٹنگ جاری ہے۔ اس اہم موقع پر کانگریس کے قومی صدر ملکارجن کھرگے اور کانگریس کے رکن پارلیمنٹ راہل گاندھی نے ووٹروں سے خاص اپیل کی ہے کہ وہ اپنے حق رائے دہی کا استعمال کریں اور جمہوریت میں اپنی آواز بلند کریں۔

کانگریس صدر ملکارجن کھڑگے نے سماجی رابطے کی ویب سائٹ ایکس پر لکھا، "جموں و کشمیر تبدیلی کے موڑ پر کھڑا ہے۔ آج، جب 26 نشستوں کے لیے دوسرے مرحلے کا ووٹنگ ہو رہا ہے، میں جموں و کشمیر کے لوگوں سے اپیل کرتا ہوں کہ وہ اپنے جمہوری حقوق کے استعمال کے لیے بڑی تعداد میں ووٹ دیں۔ جب آپ ای وی ایم پر ووٹنگ بٹن دبائیں، تو سوچیں کہ آپ کی دہائی کس طرح دھوکہ دہی میں ضائع ہوئی۔"

انہوں نے مزید کہا، ’’مثبت تبدیلی کے لیے ایک ووٹ آپ کے مستقبل کو محفوظ کرے گا۔ میں پہلی بار ووٹ دینے والے ووٹروں کا خیرمقدم کرتا ہوں، جو بہتر مستقبل کی امید رکھتے ہیں۔ یہ انتخابات جموں و کشمیر کے لیے ایک اہم موڑ ہیں۔"

وہیں، راہل گاندھی نے بھی ووٹروں کو مخاطب کرتے ہوئے لکھا، ’’جموں و کشمیر کے میرے بھائیو اور بہنو، آج دوسرے مرحلے کا ووٹنگ ہے۔ بڑی تعداد میں نکل کر اپنے حق، خوشحالی اور برکت کے لیے ووٹ دیں۔ بی جے پی حکومت نے آپ کی توہین کی ہے۔ آپ کا ایک ایک ووٹ جموں و کشمیر کو خوشحالی کی راہ پر لائے گا۔‘‘

اس الیکشن میں جموں و کشمیر کے عوام 239 امیدواروں کے مقدر کا فیصلہ کر رہے ہیں۔ دوسرے مرحلے میں ووٹنگ کشمیر کے تین اضلاع کی 15 نشستوں اور جموں کے تین اضلاع کی 11 نشستوں پر ہو رہی ہے۔ انتخابات کے نتائج 8 اکتوبر کو جاری کیے جائیں گے۔